Së fundmi Presidenti turk Recep Tayyip Erdogan ka bërë thirrje qytetarëve të Turqisë në Europë , për të rritur normat e tyre të lindjes dhe të bëjnë nga pesë fëmijë, me argumentin se një rritje e popullsisë turke do të jetë përgjigja më e mirë për të “vulgarizimin, armiqësinë dhe padrejtësinë” e BE-së, raporton Telegraph.uk duke iu thënë turqve që jetojnë në vendet e BE-së se ‘ju jeni e ardhmja e Europës’.
“Ju bëj thirrje qytetarëve të mi, motrave dhe vëllezërve në Europë. Vendi ku po jetoni dhe punoni është bërë tani atdheu juaj. Hapni më shumë biznese, dërgoni fëmijët tuaj në shkollat më të mira, jetoni me familjet tuaj në lagjet më të mira, mbani makinat më të mira, jetoni në shtëpitë më të mira”, vijoi ai gjatë një fushate në qytetin perëndimor Eskisehir.
Mesazhi u drejtohet 1.4 milion votuesve turq që jetojnë në Gjermani, si dhe popullsisë së mëdha turke në Holandë, Austri, Bullgari dhe në Mbretërinë e Bashkuar.
Në kuadër të mbajtjes së referendumit turk në 16 prill, ku pritet të votohet për shtimin e kompetencave të presidentit Erdogan, Hollanda dhe Gjermania kanë ndaluar aktivitetet politike të Turqisë. Kjo solli akuza të ndërsjellta mes Turqisë dhe vendeve të BE.
